ammud-b1

Win yettaṭṭafen imi-s, ad yiɣzif leɛmeṛ-is.
Aḥeddad n wawal.
Mi yuker ḥedreɣ, mi yeggul umneɣ.
Asagem, yezga yeččur. Aseksut, qfel-it ifuṛ. Taguni, alamma d ṭṭhur.
Anwa ara ak-yamnen, a win yeskiddiben, asmi ara d-tiniḍ tidet.
Argaz, d win i tent-iferrun, mačči d win i tent-iḍellun.
Yir lehduṛ, tekksen ddnub;
Annar, akka i yettarwat, yelli-k win yebɣun yaɣ-itt.
Yir zzwaǧ, yif-it fiḥel.
Yelha ṛṛay-agi, lukan mačči d kemm i t-id-yefkan.
Bḍu-ten, teččeḍ-ten.
Acettiḍ, yegren yekkes, a lall-is ur ttayes.
Tiɣɣersi teɣleb tafawet.
Tin d-iqesden acewwaḍ, tečča-t. Tin d-iqesden ifeggagen, tewwi-ten.
Yettarew ugudu lexṛif.
Awtul xfif, rnan-as iḍebbalen.
Axxam mebla tamɣert am tmazirt mebla tadekkaṛt.
Ma yif-ik gma-k leɣrus, kker s afras d ttelqim.
Ma yif-ik gma-k lebṛuj, bnu s lyajuṛ urqim.
Ma yif-ik gma-k meṭṭu, ay aḥbib xdem neɣ qqim.
Yyaw ad nuksanet.
Qqarren, yiwet n tikkelt, deg unejmaɛ, yebda ara d-iheddeṛ umeqqran n taddart.
Yal tikkelt ara d-yini: "Lemmer nuksan ilaq waya".
Yenna-d awal-agi ɛecrin n yiberdan, lɣaci yeɛǧeb-asen wayen i d-yeqqar. 
Acku s tidet d iɣeblan d tlufa ttidiren iɣef d-iheddeṛ.
Armi yekfa, yenṭeq-d yiwen n urgaz mbeɛid mi d-iṣella.
Yenna-asen: "Ay ameqqran, ayen akk i d-tenniḍ yesdeq, maca lemmer i nuksan, yyaw ad awen-iniɣ."
Nnan-as: "Ini-aɣ-d."
Argaz: "Yyaw seg uzekka ad nuksanet, ilaq ad nuksan, ihi ad nuksan."
Abruy seg tmeddurt n Sliman Ɛmirat.
"Limer ad iyi-ssextiṛen gar Lezzayer d tugdut, ad xtireɣ Lezzayer."
Wigi d imeslayen n Sliman Ɛmirat i yeqqimen deg wallaɣ n waṭas n tsutwin.
Ilul Sliman Ɛmirat ass n snat tmerwin d ukkuẓ deg yulyu agim d tẓa twinas d snat tmerwin d tẓa.
Ilul deg taddart n Tqerbust asamar n Tubiret.
Yufrar-d sdat wallen n ƐAbdeṛṛeḥman Mira i as-yessutren ad yinig ɣer Fṛansa.
Akken ad yenhu Izzayriyen yellan dinna ɣef temsalt n tegrawla tazzayrit.
Syin, yuɣal d imḍebber n "Le groupe de choc" yettabaɛen akabar n Tirni n uslelli aɣelnaw.
Tirni n uslelli aɣelnaw n temnaḍt n Pari mgal imssaliyen n Umussu aɣelnaw azzayri.
Yettwaṭṭef ɣer lḥebs deg useggas n wagim d tẓa twinas d semmus tmerwin d ṭam di Qsentina.
Acu kan, urǧin yerẓa lḥebs ifadden-is imi deg yir tignatin-nni ikemmel amennuɣ-is.
Mi d-yeffeɣ si lḥebs, yuɣal ɣer Fṛansa s lekwaɣeḍ ur nṣeḥḥa ara.
Ikemmel deg ubrid "Le groupe de choc" n Pari.
Yettwasenz-d deg useggas n wagim d tẓa twinas d seddis tmerwin d yiwen.
Yettwaṭṭef ɣer lḥebs tikkelt-nniḍen anda i yesεedda lbaṭel deg "Saint Maurice L’ardoise".
Yeffeɣ-d s ddaw leḥṛis n tmesbanit i heggan yisdawanen izzayriyen d iṛumyen di Pari.
Yuɣal-d ɣer Lezzayer anda ikemmel amennuɣ.
Yeslal-d, deg useggas n wagim d tẓa twinas d seddis tmerwin d ṣa, Amussu amagday i usnulfu azzayri.
I iqubel udabu s tuṭṭfa n Sliman Ɛmirat ɣer lḥebs, deg useggas n wagim d tẓa twinas d seddis tmerwin d ṭam.
Teḥkem fell-as tsenbert tagrawliwt n Wehṛan s lmut.
Yesɛedda-d ukkuẓ n yiseggasen d uzgen di lḥebs n Wehran i wumi qqaren Sanṭa Cruz.
Seg Wahṛen ɣer lḥebs n Beṛwagiya anda ara yernu εamayen, syin ɣer lḥebs Lḥaṛṛac.
Yerna seddis n wagguren din, syin yeffeɣ-d deg useggas n wagim d tẓa twinas d ṣa tmerwin d semmus.
Yeffeɣ-d ssmana seld lmut n baba-s.
Ikemmel amennuɣ armi d aseggas n wagim d tẓa twinas d ṭam tmerwin d tẓa. 
Deg useggas-agi, yuɣal Amussu amagday i usnulfu azzayri iteddu s wudem unṣib ass.
Ameɣnas d ameɣras, yessarmen Lezzayer tamagdayt, tin ara yeddun ɣer sdat s umgarad-is utlayan adelsan neɣ asnaktan.
Daɣen, s udiwenni d usqerdec n temsal.
Iṛuḥ Sliman Ɛmirat, deg umenzu n yulyu deg useggas n wagim d tẓa twinas d tẓa tmerwin d sin.
Iṛuḥ, ad iwali i tikkelt taneggarut tafekka n umeddakkel-is n umennuɣ Muḥemmed Buḍyaf i yettwanɣan kraḍ wussan kan uqbel.
Yeḥbes wul-is mi i t-iwala.
"S tezlit i d-senfalayeɣ iḥulfan, yis-s i ssutureɣ tumast."
Seg gar yinaẓuren iqdimen, ar ass-a ur yesris ara agambar-is, ɣur-s amecwar meqqren n lfen zeddigen.
Wagi d anaẓur Aɛmaṛ Seṛṣuṛ.
Newwi-d yid-s awal deg tdiwennit-a ɣef uḍebsi-s amaynut d umecwaṛ-is deg ccna.
Aɣmis n Yimaziɣen : "Efk-aɣ-d agzul ɣef uḍebsi-a-inek amaynut.
Aɛmaṛ Seṛṣuṛ: Asentel n uḍebsi "Gar-ak d yiman-ik", yewwi-d ɣef yiwet n tmiḍrant tafiluzufit.
Win ara as-yeslen, d iman-is ara inadi deg-s (d afud neɣ d facal).
Deg-s ad tegzuḍ, ad tqebleḍ wiyaḍ.
Ad d-yebnu iman-is s tudert n tiẓedt.
Mi d-yessekfel tamuɣli, ad iqelleb ɣef tidet-is gar-as d yiman-is.
D anadi-a i yesselḥuyen tamhazt n lumuṛ.
Yenna Xalil Ǧebran "Tidet am yitran, nettwali-ten kan deg yiḍ."
Tidet am tenkerra n tudert.
Ur d-tettban ara anagar ɣer wid yessawaḍen ssekfalen-d lekdubat.
Tamussni-a n yiman, tella akk deg uḍebsi, deg ṭam n tezlatin-is.
S umata, d ajabi ɣef yiman s yiwet n tmuɣli tafelsafit.
D acu-ten wuguren i d-temlaleḍ segmi tettheggiḍ tasfift-a armi d ass n tuffɣa-ines ?
Mmugreɣ-d uguren am yinaẓuren-nniḍen, icennun deg tmurt n Lezzayer.
Tamezwarut, d ayen yerzan tadrimt, acku d anaẓur ara iseṛfen ɣef usekles, yerna ccɣel-a ɣlay.
Ulac ḥedd-nniḍen ara ak-yallen s tedrimt, d ayen i d-mmlaleɣ nekk s timmad-iw.
Tis snat, qlilit wid itewlen i uxeddim-a deg tzeqqa n usekles.
Dagi dɣa mmugreɣ-d aɛewwiq n tifin n umdan ara d-yesdakklen tizemmar i ufares n tezlit takemmalit.
Afares n tezlit takemmalit seg tazwara alamma d taggara-s.
Daɣen, ugur n yimsiẓreg d waydeg ara temsefhameḍ ɣef wakud n tuffɣa n uḍebsi.
Kečč yebdan ccna deg tallit taqburt, amek tettwaliḍ tizlit taqbaylit ass-a ?
Tizlit n teqbaylit imir-a, ha-tt-an deg waddad ukris.
Leqbayel ( s wid iḥemmlen ccna, s wid icennun) mwezzaɛen ɣef ṛebɛa n tɣemmar n ddunit.
Annect-a akken i nezmer ad d-nini yelha imi tteffɣen ɣef yidelsan n lbeṛṛani.
Nezmer ad d-nini yenqes imi tettuyen ccna-nsen.
Azal n tezlit simmal ineqqes s usemres n upirati deg yiẓeḍwan inmettiyen, ɣef waya, aḍebsi ur yettnuzu ara.
Tayeḍ, tuddsa n tmeɣriwin n ccna d temliliyin akked tudfa ɣer wallalen n taywalt.
Llan wid yettagin deg-sen ad xelṣen izerfan n umeskar.
S wakka, anaẓur ur yesɛi ara tilelli, d ayen yerran tuget deg-sen di rrif.
Aẓayer-nni n ufennan ur yelli ara deg tilawt, d asugen kan.
Maca ɣas akka, mazal yettkemmil icennu, yettmuddu-d.
Annenct-a meṛṛa i d-bedreɣ, yettarra tizlit ɣer deffir.
Ma d inaẓuren i d-yettenkaren, ɛerrḍen ad xedmen leqdic zeddigen.
Leqdic ilaq ad yili, ɣas gar yiɛewwiqen. Akken tizlit taqbaylit ad tezbu, ad tesɛu imal yelhan.
Acu i ak-d-yettakken afud armi mazal tcennuḍ ?
Llant kraḍ n temsal.
Acku ḥemmleɣ ccna seg temẓi-w, ur zmireɣ ara ad as-anfeɣ s sshala.
Diɣen, tizlit d abrid yelhan i usenfali, acku tettak tilelli n umeslay.
Taneggarut, d amennuɣ ɣef tmaziɣt, d tizlit i ttafeɣ d tagnit d tarrayt iwulmen.
Yal yiwen s wacu yettnaɣ, wa s tira, wa s umezgun, wayeḍ s ccna.
Ma tzemmreḍ ad d-temmeslayeḍ cwiṭ ɣef tezlit "Yiwen wass".
Tizlit i txedmem kečč d Ben Muḥemmed deg useggas n wagim d tẓa twinas d ṭam tmerwin d sin?
"Yiwen wass", d tizlit i d-yeddan deg uḍebsi "Cfu ay ixef-iw", deg-s ṭam n tezlatin.
Ben Muḥemmed, d netta i yuran tuget n yiḍrisen n tesfift-a.
Ben, akken i as-nessawal, d amedyaz ur nesri ara tabadut neɣ asenked.
Yessaweḍ ad iger tilawt s umseḍfer daxel n uḍebsi-a.
"Yiwen wass", d tizlit anida amedyaz yedder, yumen s wayen yura.
Ladɣa deg uḥric ideg yenna, "Yiwen wass yenṭeq uẓru, ad d-yini i yizgaren mmuh".
"Yiwen wass ad d-yarew uqerru, seg yimeẓẓuɣen ad d-yini abbuh.
Yiwen wass ad d-yekker usefru, di mkul awal ad d-yeddu ttfuh”.
Yessegza-d asefru s telqey, rnu yeččur d asirem.
D wagi i d amennuɣ n tsutwin ɣef tumast.
Anta tameɣra i tecniḍ, ur tezmireḍ ara ad tt-tettuḍ?
Ayɣer ?
D tameɣra n sin n wussan deg cutember deg useggas n wagim d tẓa twinas d ṣa tmerwin d tẓa.
Deg Larebɛa n At Yiraten, akked Lewnis Ayit Mengellat.
Imiren i bdiɣ ccna.
Cfiɣ xedmeɣ aḥric amezwaru n tmeɣra.
D tagnit ideg mlaleɣ Ben, i lliɣ ssneɣ uqbel s yisem kan.
Ar taggara n tmeɣra, neɣtes, nemtawa ad neqdec akken.
D ayen i d-yellan umbaɛd s tesfift "Cfu ay ixef-iw".
Ussan-a, i yezri wass n tmenɣiwt n Lwennas, acu n wassaɣen i aken-yezdin deg ccna ?
Di tazwara, timenɣiwt-is d lexsaṛa meqqren i ccna s umata d tezlit taqbaylit ladɣa.
Nemyussan nekk yid-s, nemyaggar deg waṭas n tegnatin, ladɣa deg Paris, tikwal yettili Ben Muḥemmed.
Nettmeslay ɣef tẓuri, tasertit d waddad ideg tettidir tmurt-nneɣ lawan-nni.
Tikkelt taneggarut i t-walaɣ, deg Tizi Uzzu, aseggas neɣ aseggas d uzgen send timenɣiwt-ines.
Yesnubget-iyi-d ɣur-s s axxam.
D ayen ur d-neḍri ara acku yella wayen i yi-yeṭṭfen.
Ad fell-as yeɛfu Ṛebbi.
Kunwi yecnan di tallit ideg tettwagdel teqbaylit, amek tettwaliḍ imal n tmaziɣt di tmurt n Lezzayer?
Amek tettwaliḍ imal-is gar wayen akka iḍerrun ass-a?
Lliɣ qqareɣ di tesnawit, asmi iɣallen n laman usan-d ad aɣ-ḥebsen akked waṭas n yimeddukkal.
Send tameɣra i d-nessuddes i lmend n semmus di yulyu.
Acku d tizlatin d tceqquft n umezgun i yerẓan kra n yisula n tsertit i yellan deg wahil.
Imir-a tamaziɣt d tunṣibt di tmendawt, tettwaselmad akken ilaq neɣ s kra n lexṣaṣ.
Maca yettili leqdic sɣur imnadiyen d yimazzagen, ɣef waya ad d-nini tleḥḥu ɣer sdat.
Ad asent-semmiɣ tirennawin, maca ayagi yezmer ad yuɣal d taɣawsa ara iḥebsen anefli n yidles d tutlayt tamaziɣt.
D taɣawsa ara iḥebsen anefli n yidles d tutlayt tamaziɣt ma ur ikemmel ara ubrid, ma ulac tasuta ara tt-irefden.
Ayen i d-yeqqimen ilaq ad yettwaxdem, ɣas di tlemmast n wuguren.
S wakka ad d-yili ufares deg yakk taɣulin, d usnerni n uselmed-ines akken ad tettusemres yal ass.
Ma gar wayen akka iḍerrun, ur ilaq ara ad neqqim alamma yeɣli udabu neɣ ibeddel wayeḍ.
Ilaq seg tura, ad tettusewseɛ, ad as-ttunefken wallalen, akken ur nettuɣal ara ɣer teqdimin.
Awal-ik n taggar.
Ad ak-snemreɣ aṭas, acku seg wid yeṭṭafaren leqdic-inu.
Ad snemreɣ Aɣmis n Yimaziɣen iyi-yefkan tagnit, ad d-mmeslayeɣ deg yisebtaren-is.
Sslam-iw d ameqqran i yimeɣriyen-nwen akked wid ara yesmeḥsen i uḍebsi-a aneggaru.
Ssarameɣ d leqdic ara iɛeǧben medden.